|
غوره پروګرامونه
تازه خبر:
- د سيمه ييزو پوليسو او وسله والو طالبانو ترمنځ نښته
- سبا په مصر كې د جمهوري رياست ټاكنې ترسره كېږي
- هارپر افغانستان سره د خپلو مرستو پر دوام ټینګار وکړ
- افغانستان کې د امریکا سفیر له خپلې دندې استعفا کوي
- د افغان ځوانانو كركټ اكاډمۍ يوې پاكستانۍ لوبډلې ته ماتې وركړه
- هند كې د اورګاډو ټكر له كبله ۱۵ تنه ووژل شول
د كليد ګروپ
د ننګرهار کانال حکومت ته سترګې اړوي
لیکونکی كليديكشنبه 09 سلواغه 1390 ساعت 09:22
د ننګرهار ولايت ډېرى استوګن وايي چې د ننګرهار د کانال رغولو ته دې په اساسې ډول جدي پاملرنه وشي او هغه فارمونه چې ويجاړ شوي او له منځته تللې، بايد له سره ورغول شي.
دوى غوښتنه کوي چې د ننګرهار د کانال پروژې ته دې افغان دولت او په ځانګړي ډول ولايتي اداره خپل پوره پام ور وګرځوي.
د ياد ولايت اوسېدونکى محمد فهيم نادر د دغه كانال په اړه خپل نظر داسې څرګندوي:((که چېرته په کانال کار وشي، نو له يوې خوا به د ننګرهارکانال اباد شي او له بلې خوا به هغو کسانو ته د کار زمينه برابره شي چې پخوا يې په دې فارمونو کې کار کاوه، خو اوس مهال وزګار ګرځي.))
نوموړي د خپلو خبرو په دوام وويل: (( د کانال په بيارغولو به د ننګرهار اقتصاد په پښو ودرېږي او ډېرو بې روزګارو ته به کار هم پیدا شي او کرنه به وده وکړي.))
د دغه ولايت يو بل استوګن غالب هم ورته نظرلري او وايي: ((د ننګرهار کانال جدي بیارغونې ته اړتیا لري، په دې پورې د خلکو ژوند تړلی دی.))
غالب زياتوي: (( ننګرهار په همدې کانال اباد اوهميشه بهار و، خو كه دا په معياري توګه جوړ نه شي، نو زموږ اقتصادي ستونزې به هم حل نه شي.))
د ننګرهار اوسېدونكي دا غوښتنې پر داسي مهال راپورته كوي چې د ننګرهار د کانال رياست نوې رئيس تازه په كار پيل كړى دى.
د كانال نوى رئيس انجنير زيارت ګل راحل وايي چې د ده ټاكل كېدل د دې لپاره دي چې د كانال په برخه كې معياري او د بيارغونې كارونه وكړي.
راحل زياتوي: (( څو ورځې کېږي چې زه د کانال د رئيس په توګه معرفي شوى يم، خو زه له رغوونکو پلانونو سره دې رياست ته راغلې يم او د خلکو ټولو غوښتنو ته به چې له موږ يې لرې تر ډېره بريده مثبت ځواب ورکړو.))
د راحل په وينا، دوى دوه ډوله بودجه لري: (( يوعادي بودجه ده چې د کرنې وزارت لخوا د کانال رياست ته ورکول کېږي او بله انکشافي چې څه د وزارت لخوا کانال ته ورکول کېږي او څه د نورو مرسته کوونکو ادارو لخوا چې اوس مهال د اسيايي پراختيايي بانک لخوا د کانال د بيارغونې په هدف ٢٥مليونه امريکايي ډالره ورکړل شوي دي.))
نوموړی زياتوي: (( د ايټالين کوپريشن لخوا له ننګرهار کانال سره د دوه مليونه يورو ژمنه شوې، خو تراوسه مو دا مرسته نه ده ترلاسه کړې.))
رئيس راحل وايي چې په دې پيسو به په صادقانه ډول د ننګرهار کانال ډېره برخه ورغوي او دا پيسې به په څلورو کلونو کې په مصرف ورسول شي.
راحل په ورته وخت کې دا هم وايي چې دوى د اوبو کمښت د کانال له سترو ستونزو څخه ګڼي.
نوموړي زياتوي: (( موږ د هډې په فارم کې د کانال اړوند څلور زره هکتاره ځمکه لرو، خو د برېښنا د نشتوالي له كبله ورته اوبه نشو برابرولى چې سږکال شاړې پاتې شوي، خو په راتلونکې کال کې به ورته د اوبو زمينه هم برابره کړو او هغه فارمونه به له سره ورغوو چې له منځه تللي دي.))
د ننګرهار د كانال د رئيس په خبره، په څو راتلونکو کلونو کې به د کانال پر ځمکه د زيتونو، نارنجو، مالټواو ليمو باغونه چې په ننګرهار كې ښه حاصل ورکوي، جوړ کړي.
خو ده د سيمې پر اوسېدونكو هم غږ وكړ چې د كانال په بيا رغونه كې ورسره مرسته وكړي: (( اوس مهال د امنيتي ستونزو له كبله نشو کولى چې د کانال سمه څارنه وکړو، په دې كې د ولسي خلكو مرسته حتمي ده.))
ياده دي وي چې د ننګرهارد کانال پروژه د دې ولايت له سترو اقتصادي سرچينو ګڼل کېږي چې اوس مهال يې اقتصادي عايدات کمرنګه شوي دي.
کارپوهان په دې عقیده دي چې د تېرو درې لسیزو جګړو دا پروژه له ځوړ سره مخ کړې ده.
د کانال اړوند د کينو، مالټو، نارنجو او زيتونو ګڼ باغونه يا چورلټ شاړ شوي او يا د شاړېدو له ګواښ سره مخ دي.
د ننګرهار د کانال اړونده ځمکه ټولټال ١١زره هکتاره ده چې اوسمهال يې د کانال رياست د مسؤلينوپه خبره ٤زره هکتاره شاړه پرته ده او له پاتې ٧زره هکتاره ځمکې يې حاصلات اخستل کېږي.
